Alvarellos Editora

  • 0 Items - 0,00 €
    0
    • Non hai produtos no carriño.
    • Galego Spanish English
Poden pensar as máquinas-Alvarellos-Ed-2026
NovoNovo
Engadir ao carriño

Poden pensar as máquinas?

17,00 €

Senén Barro

142 pp. 13 x 23 cms
ISBN 978-84-18567-90-2
PAPEL FSC. Amigo dos Bosques

A intelixencia artificial (IA) dedícase a percorrer o camiño que vai das máquinas carentes de entendemento ás que razoablemente podemos considerar intelixentes. Aínda que ten xa décadas de historia, cunha vida de altibaixos, se a comparamos con outros campos do saber é unha disciplina científico-tecnolóxica recente.

O físico Senén Barro é todo un experto en intelixencia artificial. Este 2026 Alvarellos Editora publica o seu ensaio Poden pensar as máquinas? onde, dun xeito divulgativo e ameno, nos introduce neste novo mundo que se abre ante nós.

O impacto que a IA está a exercer nas nosas vidas é de tal calibre que non paramos de nos asombrar e de formulármonos moitas preguntas. Isto é normal e, ademais, é bo que así sexa. Ao cabo, aínda que as máquinas nos dean cada día máis e mellores respostas, as preguntas –sobre todo as máis transcendentes– seguen a ser nosas.

Por iso este libro comeza cunha pregunta: Poden pensar as máquinas?, e discorre facéndose moitas outras: Que é a Intelixencia Artificial e como xurdiu? Son parecidos un cerebro e unha computadora? Alcanzarán as máquinas a superintelixencia?

Agardamos que atopen aquí algunhas respostas, mais sobre todo que estas páxinas lles susciten moitas máis preguntas…

 

Engadir ao carriño
Arbore-arriba-alvarellos-ed-2026
NovoNovo
Engadir ao carriño

Árbore arriba. Memoria das orixes

17,00 €

X. M. Álvarez Cáccamo

144 pp. 13 x 23 cms
ISBN 978-84-18567-89-6
PAPEL FSC. Amigo dos bosques

Árbore Arriba. Memoria das orixes é o título da nova obra do poeta, narrador e ensaísta Xosé María Álvarez Cáccamo, Pepe Cáccamo, que Alvarellos Editora publica a comezos deste 2026 na Colección Oeste.

Esta obra completa e talvez culmina un proxecto moi persoal do autor: a narración da súa memoria familiar, un dos eixes da súa creación literaria.

«Gabeo árbore arriba na procura das miñas raíces familiares –afirma o poeta–. Os alicerces de calquera xenealoxía humana dispóñense na altura, non asentan na terra. Son raíces aéreas».

Polo tronco principal da súa estirpe ascende o autor ata as pólas dos seus oito bisavós e bisavoas e, de xeración en xeración, vai tecendo o relato das singulares peripecias vitais dos devanceiros apelidados Cáccamo, Ambrosino, Frieben, Zimmmermann, Blázquez, Ballester, Álvarez e Limeses, a carón das fotografías que os identifican.

 

 

Engadir ao carriño
Bestiario das alturas
NovoNovo
Engadir ao carriño

Bestiario das alturas. A incrible historia dos escalatorres

22,00 €

Inacio e Iván Suárez

64 pp. 23 x 31 cms.
ISBN 978-84-18567-88-9.
PAPEL FSC Amigo dos Bosques

NP_GAL_Bestiario_das_alturas_2025_converted

Mostra-Bestiario-alturas-alvarellos-ed-2025-26

Hoxe semellan seres de ficción, pero existiron realmente. Son os coñecidos como Escalatorres. Personaxes míticos que, antes da guerra civil, ascendían, sen protección ningunha, ata a cima dos edificios máis emblemáticos de Galicia e do noroeste da península. Bestiario das alturas (Alvarellos Editora-Consorcio de Santiago) é o título dunha novela gráfica escrita por Inacio e ilustrada por Iván Suárez, que concibida para todos os públicos, recupera as extraordinarias existencias destes artistas circenses.

Como o granadino Puertollano, que coroou en 1909 a compostelá Torre Berenguela; o Barquerito, Manuel Escudero, quen vestido de toureiro gabeaba pola torre da Peregrina en Pontevedra, ou o portugués Antonio Sousa e a súa muller, alcumados Os Morcegos, pois escalaban cos ollos vendados a concatedral de Vigo… Este volume percorre ata quince biografías realmente incribles.

A partir destes feitos reais, a ficción sitúase en 1965. Grazas ao daquela alcalde de Pontevedra, Xosé Filgueira Valverde, o escritor Álvaro Cunqueiro coñece ao escalatorres Barquerito. Nun paseo pola cidade do Lérez irán xurdindo, na conversa, os máis famosos gabeadores da nosa historia.

Esta novela gráfica pretende ser tamén unha reflexión sobre o medo e como enfrontarse a el. «Os chinos din que o medo sempre está de costas, que se estivese de fronte non habería ninguén vivo, todos teriamos morrido xa de medo», afirmaba Álvaro Cunqueiro.

Engadir ao carriño
Pegadas-no-muro-capa
NovoNovo
Engadir ao carriño

Pegadas no muro. Cultura urbana e arte nas rúas

23,50 €

Patricia Cupeiro
Miriam E. Cortés
(eds.)

240 pp . 15’5 x 23’0 cms.
ISBN 978-84-18567-73-5
PAPEL FSC Amigo dos Bosques

NP_GAL_Pegadas_no_muro_dec_2025

Analizar a relevancia das manifestacións artísticas coñecidas como arte urbana e muralismo contemporáneo é o obxectivo deste volume colectivo titulado Pegadas no muro. Cultura urbana e arte nas rúas (Alvarellos Editora). Unha análise desde o ámbito académico, mais tamén desde o profesional e do artístico. Non hai precedentes en Galicia dunha publicación similar, que aborde dun xeito integral o fenómeno dos graffitis, da arte urbana e do muralismo público, nun contexto que abarca desde o internacional ao local.

O proxecto naceu en Lugo en 2024, ao abeiro dun curso celebrado na Facultade de Humanidades. Coordinado polas dúas investigadoras da USC que tamén coidan da presente edición, Patricia Cupeiro e Miriam E. Cortés. Colaboran neste volume catorce especialistas de diferentes disciplinas.

O carácter de potente motor de cambio social destes fenómenos culturais (como ferramenta de identidade e cohesión comunitaria), a visibilidade das mulleres ou a conquista de espazos rurais son algúns dos temas tratados. Tamén, a recente institucionalización do fenómeno –que fai emerxer dúbidas sobre a súa autenticidade cultural– ou as tensións entre legalidade e lexitimidade.

Desde Lugo, cidade que estes anos acadou relevancia internacional grazas a algún dos seus espectaculares murais, viaxamos tamén por outras experiencias, en Galicia –Ferrol/Canido, Lugo, Burela, Fene, Ordes , Carballo, As Pontes, Vigo ou Compostela…– e fóra dela –Lisboa, México e Santiago de Chile–.

Así mesmo, ata oito artistas aportan as súas creacións: desde os anónimos Primobanksy ou Ferrol Mola ata Diego AS, Bublegum, Edu Hermida, Emi de las Heras, Pía Piadosa e Yoe33.

ESCRIBEN NESTA OBRA

Laura Luque Rodrigo
Lorena Arévalo Iglesias
Miguel Anxo Rodríguez González
Adris Díaz Fernández
Beatriz Fernández Herrero
Luzia Oca González
Aurelia Balseiro García
Alba Díaz-Geada
Begoña Fernández Rodríguez
Patricia Cupeiro López
Andrea Barreira Freije
Clara Rodríguez Cordeiro
Ascensión Moreno González
Antonio Alcántara Alcántarae

 

EMPEZAR A LER: Mostra-Pegadas-no-muro

 

Engadir ao carriño
Semente-de-mencer-capa
Engadir ao carriño

Semente de mencer. Obra poética I. Volumes editados 1970-2006

37,00 €

Darío Xohán Cabana

746 pp . 13 x 20 cms.
ISBN 978-84-18567-86-5.
PAPEL FSC. Amigo dos Bosques

NP_GAL_Semente_de_mencer_nov_2025

Baixo o título de Semente de mencer publicamos toda a obra poética, editada en libro en vida do autor, de Darío Xohán Cabana (Roás, 1952-Romeán, 2021). Un coidado volume de 746 páxinas, en capa dura, dentro da nosa colección Rescate. E nunha edición, estudo e notas a cargo de Anxo Angueira.

Reúne os quince libros publicados en vida do autor, dende Verbas a un irmao (1970) ata Cabalgada na brétema (2006). Ademais, aporta un apartado gráfico que percorre a vida de Xohán Cabana a través de fotografías, manuscritos e capas históricas dalgún dos seus títulos.

Así o explica, no limiar, Anxo Angueira:

«Non sei se nun caso de escritor total coma o de Darío Xohán Cabana procede mellor que en ningún outro dicir que é poeta por riba de todo. A poesía organizou toda a súa vida literaria de tal xeito que concibimos a monumental obra de Darío como a dun poeta constante e sen descanso.

»Poboada de flores de aceiro e en galego literario rico, aberto e poderoso, a poesía de Darío, ollada desde hoxe, convídanos a facer memoria das grandes encrucilladas políticas da Galicia contemporánea, especialmente as que el viviu en primeira persoa. Pero tamén nos leva ás grandes encrucilladas atemporais do ser humano, aquelas que o presentan diante do amor e mais da morte, diante da angustia e da esperanza, diante da liberdade aferrollada e da semente de mencer».

A presente edición leva por subtítulo «Volume 1» porque esta editorial prepara para finais de 2026 un segundo volume que reunirá a obra inédita e a dispersa do autor.

Títulos reunidos en Semente de mencer:

Verbas a un irmao (1970), Home e terra (1970), Romanceiro da Terra Chá (1973), Mortos porque Galicia viva (1974), Elexía nunha escuridade mortal (1974),
Ábrelle a porta ó día (1981), A fraga amurallada (1983), VIII Fragmentos (1987), Amor e tempo liso (1987), Cantigas de amor vilao (1987), Patria do mar (1989), Chirlo Merlo na figueira (1990), Cinco lendas (1993), Canta de cerca a morte (1994), Cabalgada na brétema (2006).

Engadir ao carriño
O-xénero-detrás-da-cámara-CAPA
Engadir ao carriño

O xénero detrás da cámara. Identidades e narrativas na fotografía galega contemporánea.

22,00 €

Jennifer Novoa Domínguez
Miguel Anxo Rodríguez González
(eds.)

186 pp . 15’5 x 23’0 cms.
ISBN 978-84-18567-87-2
PAPEL FSC-Amigo dos Bosques.

NP_GAL_O_Xénero_detrás_da_cámara_nov_2025

A fotografía, como medio, sempre se prestou ao cuestionamento dos límites entre o público e o privado, ás exploracións que, desde o íntimo, acadan unha dimensión pública e política. Este novo libro, O xénero detrás da cámara. Identidades e narrativas na fotografía galega contemporánea (Alvarellos Editora) é unha obra colectiva impulsada polo grupo de investigación IDEAHS da Universidade de Santiago e coordinada por Jennifer Novoa e Miguel Anxo Rodríguez, historiadores da arte. Nela preténdese ampliar os relatos sobre fotografía en Galicia asumindo unhas coordenadas hoxe moi presentes na análise da arte e a cultura visual.

Presentamos unha historia plural e inclusiva da fotografía en Galicia a partir de textos que valoran as voces múltiples e que reivindican a importancia do xénero como categoría de análise.

Esta investigación colectiva reúne as voces de oito fotógrafas e investigadoras que asumen o cuestionamento e a necesidade de ampliación do canon existente.

A DERRADEIRA ENTREVISTA A ANNA TURBAU

Así mesmo, a presente publicación quere render homenaxe póstuma á fotoxornalista catalá Anna Turbau, cuxa derradeira entrevista aparece aquí recollida.

ESCRIBEN NESTA OBRA

Jennifer Novoa Domínguez
María Gil Martínez
Olaia Sendón Ogando
Violeta Janeiro Alfageme
Miguel Anxo Rodríguez González
Andrea Costas Lago
Xosé M. Buxán Bran
Sabela Eiriz

Engadir ao carriño
Maria-Vazquez-a-mestra-socialista…CAPA-Alvarellos-ed-2025
Engadir ao carriño

María Vázquez, a mestra socialista eliminada polo franquismo

20,50 €

Aurora Marco

272 pp . 13 x 23 cms.
ISBN 978-84-18567-84-1
PAPEL FSC Amigo dos Bosques

Aurora Marco, catedrática da USC e especialisa na recuperación da memoria de mulleres galegas, especialmente as represaliadas, rescata do esquecemento a figura da mestra María Vázquez Suárez (Santiago, 1894-Pontedeume, [?], 1936).

Un ensaio de 272 páxinas que aporta ata cen fotografías e documentos históricos, a maior parte deles, descoñecidos.

Relata a autora no Limiar:

«Aquel 19 de agosto de 1936 resoaron na noite os disparos que acabaron coa vida dunha mestra vocacional, dunha renovadora pedagóxica, dunha muller progresista, militante socialista, afervoada defensora dos dereitos femininos, (…) No período republicano, as mestras tiveron un papel capital, como os mestres. O que acontece é que as súas achegas, e até os seus nomes, ficaron con moita frecuencia invisibilizados».

Nacida en Compostela, con raíces en Sober, estudou Maxisterio na Coruña, mestra na Pobra do Caramiñal e en Miño, e enterrada en Pontedeume.
Tantos anos despois, estas páxinas son memoria reparadora, loita contra o esquecemento.

A carón do relato incorpóranse o lamentable expediente de depuración, aberto catro anos despois do seu asasinato.

Engadir ao carriño
Calendario-historico-de-Redondela
Engadir ao carriño

Calendario histórico de Redondela

23,90 €

Juan Migueles Fernández

299 pp . 17,5 x 25 cms.
ISBN 978-84-18567-85-8
Impreso en Papel FSC-Amigo dos Bosques

O Calendario histórico de Redondela (Alvarellos Editora), do divulgador cultural Juan Migueles, móstranos dun xeito diferente a historia colectiva deste municipio pontevedrés. Artellado, ao longo das súas 300 páxinas, como un calendario de feitos destacados, está ilustrado con máis de cen fotografías.

Como sinala Xurxo Martínez González, responsable do Servizo de Normalización Lingüística de Redondela: «Este volume responde a unha demanda cidadá: coñecer de xeito divulgativo e breve, rigoroso e conciso, a biografía colectiva de Redondela. A vila e as parroquias. Todas elas configuran un espazo de vivencias, narradas e documentadas, ao longo dos séculos. A suma de tantos episodios explica parte da identidade redondelá. A historia política e deportiva, a mariñeira e sindical, a científica e migratoria, a artesanal e cultural. Este libro trata disto, e máis. A partir do modelo do calendario histórico ofrécensenos páxinas da vida local cunha frescura agradecida para o público lector. A cada día do ano pónselle un dato. Un libro que debera estar tanto nas casas de Redondela coma daqueles que lonxe dela senten a mesma emoción e paixón choqueiras».

 

NP_GAL_Calendario-Histórico-Redondela-nov-2025

 

 

 

Engadir ao carriño
Guia-de-Padron-segunda-edi-out-2025_Página_1
Engadir ao carriño

Guía de Padrón [2ª edición actualizada]

15,90 €

Camino de Santiago, cultura, arte y gastronomía

Manuel Garrido

ISBN 978-84-16460-54-0
Pp.: 112. Formato 12×22 cms.
Idioma: castelán

Segunda edición, actualizada, 2025-2026.

Padrón é o epicentro das tradicións que deron orixe ao Camiño de Santiago. A guía que tes nas túas mans levarache por este rico patrimonio. Ademais, descubrirás que Padrón ofrece grandes atractivos: os edificios nobres e a arte do seu milenario centro histórico, as casas fundadoras de dous escritores únicos: Rosalía de Castro e Camilo José Cela, unha gastronomía liderada polos pementos de Herbón-Padrón e a senlleira lamprea (un peixe de 500 millóns de anos). Ademais, os seus sedutores espazos naturais, bañados polos ríos Sar e Ulla, e as súas animadas festas, que non debes perder.

Máis de cen fotografías e planos explicativos ilustran esta nova proposta.

Esta é a guía que faltaba para que todas as persoas, sexan peregrinas, viaxeiras, visitantes ou veciños, descubran e gocen de Padrón.

Engadir ao carriño
Diarios-Syra-Alonso-capa-xullo-2025
Engadir ao carriño

Diarios (1938 e 1945)

21,50 €

Syra Alonso

 

Tradución de Anxos Sumai García
Introdución de Carme Vidal
Epílogo de Conrado J. Arranz

276 pp . 13 x 23 cms.
ISBN 978-84-18567-81-0
Papel FSC Amigo dos Bosques

Unha das crónicas máis impactantes da Guerra Civil española. Nova edición actualizada e ampliada con material inédito (textos e imaxes) e onde participan tres especialistas na autora: Carme Vidal, Anxos Sumai e, dende México, Conrado J. Arranz.

A voz de Syra Alonso (A Coruña, 1899-México, 1970) emerxe dende o silencio do exilio para contar unha das crónicas máis impactantes da Guerra Civil española. Estes Diarios (1938 e 1945) que agora regresan en nova edición e con material inédito, relatan o terror vivido en Galicia e a loita desesperada de Syra por salvar ao seu marido, o pintor Francisco Miguel (A Coruña, 1897-Bértoa, Carballo, 1936), durante as horas máis tristes da súa vida. Un documento imprescindible que mostra o horror do franquismo e a forza da resistencia persoal.

A presente edición dos Diarios de Syra Alonso actualiza e amplía, con diverso material inédito, o volume publicado no ano 2000 cando foran descubertos os manuscritos.

Conta coa participación de varias especialistas na autora: un estudo introdutorio actualizado da ensaísta e xornalista Carme Vidal, a tradución ao galego a cargo de Anxos Sumai García, o epílogo asinado polo profesor e investigador mexicano Conrado J. Arranz Mínguez, que descobre a faceta creativa e de narradora de ficción de Syra Alonso, y aporta un conto descoñecido da autora, titulado “Tres homiños” ambientado na Galicia daqueles días terribles.

A actual edición aporta así mesmo 16 páxinas de fotografías e documentos inéditos ou moi pouco difundidos da autora e do pintor.

 

 

Engadir ao carriño

Verdemar
primeiras lecturas

ver selección

Verdemar
primeiras lecturas

ver selección

Sobre Nós

Alvarellos editora

Somos unha editorial galega independente, que naceu en 1977 en Lugo e ten a súa sede, desde 2004, en Santiago de Compostela. Loitamos por adaptarnos ao século XXI sen perder as raíces fondas da nosa historia e cultura.

Publicamos ensaio e divulgación, poesía, orixinais guías de Santiago e Galicia, fotografía histórica, rescatamos clásicos en edicións moi coidadas… E temos un selo propio de álbum ilustrado para primeiras lecturas, Verdemar, de contos pola diversidade.

Publicamos cada ano entre 15 e 20 novos títulos. Mantemos un catálogo vivo dunhas 200 obras e un catálogo histórico de máis de 500.

O noso proxecto editorial está encabezado por Henrique Alvarellos Casas, como director e editor, e Marta Pérez Rodríguez, como xerente e administradora.  Entre os dous coordinamos un grupo de colaboradores           —filólogos e historiadores, deseñadores, ilustradores e distribuidores— cos que completamos un equipo que busca sempre seducir o público lector con novas propostas.

COÑÉCENOS
Alvarellos Editora
Powered by  GDPR Cookie Compliance
Resumen de privacidade

Utilizamos cookies propias e de terceiros para mellorar os nosos servizos e para mostrarche publicidade personalizada en base a un perfil elaborado a partir dos teus hábitos de navegación (por exemplo, páxinas visitadas).