Non temos límites (Obra dispersa, 1990-2014)
22,90 €Begoña Caamaño
Edición ao coidado de Ana Romaní, María Xesús Nogueira e Carme Vidal
324 pp. 13 x 23 cms
ISBN 979-13-88293-04-7
Impreso en Papel Amigo dos Bosques
Tres especialistas, e amigas, da escritora e xornalista Begoña Caamaño –falecida prematuramente en 2014 e protagonista en 2026 do Día das Letras Galegas–, Ana Romaní, María Xesús Nogueira e Carme Vidal, reúnen nun sorprendente volume de máis de 300 páxinas textos xornalísticos, conferencias, guións radiofónicos e outros escritos.
NP_GAL_NON_TEMOS_LIMITES_Begonha_Caamanho_Alvarellos_Ed_2026
Non temos límites. Obra dispersa, 1990-2014 (Alvarellos editora), nunha edición ao coidado de Ana Romaní, María Xesús Nogueira e Carme Vidal, descúbrenos «a outra obra» de Begoña Caamaño: a da xornalista, a da activista, a dunha autora con mirada crítica e compromiso feminista, social e político.
Non temos límites reúne os seus textos periodísticos, as conferencias, os guións radiofónicos e outros escritos que foi creando e difundindo entre 1990 e 2014.
Son máis de cincuenta textos, dos que boa parte quedaran esquecidos en diversas publicacións; outros son inéditos, e todos xuntos revélannos á Begoña Caamaño de non ficción.
«A obra xustifícase polo valor intrínseco do material que reúne –sinalan no limiar as responsables desta edición–. Heteroxéneos na súa forma, contido e destino, os escritos mostran o coñecemento e a maneira de estar no mundo dunha autora que tomou posición nos debates do seu tempo. O libro é polo tanto susceptíbel dunha dobre lectura: como unha obra de consulta e como unha sorte de biografía intelectual e vital escrita a retallos e agora reunida. A atraente personalidade da escritora e xornalista, que fascinaba a quen a coñecía, faise presente con forza nestes textos».
[A serie de fotografías que ilustra a capa é obra de Sonia Díaz].
